Sajak sunda Umbul umbul

Assalamu'alaikum Wr.Wb

Umbul-umbul nu rentul
dina tutunggul wadul
ngélébétkeun rahul

Kecap-kecap – kécap
muncrat tina ilat-ilat; bau
hangru kakawasaan
ngabanjiran nagri
ngancurkeun bangunan
ngaruntagkeun jambatan

(terus dijaradikeun proyék pikeun nawur hutang
mangsa pilihan)

Jangji-jangji nu diobral
dina panggung kabohongan
ceuhil huntu pulitik kapentingan
nu awor ku gaur knalpot aleutan abringan dukungan

Para pamingpin katorékan
Kereteg haté nu nyaroblos harepan
ukur hawar-hawar dijadikeun pertimbangan

Mangsa géol ngebor dangdut pulitik beuki maceuh
kapeurih jeung kateupercayaan ngajeroan

Bari ngajogédan kasusah,
Rahayat seuri sinis
terus nonggéngan